小品劇《BB來了》播出以嚟贏盡收視同口碑，女主角李佳芯更與《三個女人一個「因」》飾演人格分裂律師嘅黃智雯和《宮心計2深宮計》飾演霸氣十足太平公主嘅陳煒均暫時跑出，被視為視后大熱人選。但對於被視為大熱，李佳芯接受訪問時，就表明：「拍呢啲小品角色，從來都無諗過會提名。」相信大家都會覺得Ali身為TVB嘅當家花旦，點會無諗過被提名？係謙虛呀定係愛呀？

李佳芯能唔能夠跑出，就睇大台會唔會改革喇！

其實Ali講得不無道理，而且問題就出現係「小品劇」身上。因為根據過往，呢類小品劇喺大台頒獎禮上的確係陪跑，反而一啲巨製同合拍劇爭獎機會大好多。就好似去年嘅另一部小品劇《親親我好媽》，呢部劇原本都係不被睇好，但「虎媽」江美儀演出入型入格，令好多人有共鳴而成為大熱，可惜到頒獎禮當日，連最後五強提名也沒有出現，輸咗俾巨額投資，首部4K全實景拍攝《不懂撒嬌的女人》嘅唐詩詠。

睇返過去十年攞視后的得主，2017唐詩詠《不懂撒嬌的女人》　2016 胡定欣《城寨英雄》2015《鬼同你OT》2014余詩曼《使徒行者》2013 田蕊妮《巨輪》2012 楊怡《名媛望族》2011 胡杏兒《萬凰之王》2010 鄧萃雯《巾幗梟雄之義海豪情》2009 鄧萃雯《巾幗梟雄》2008 米雪《溏心風暴之家好月圓》，基本上係當年重頭劇女主角的天下，除了2015年《鬼同你OT》，製作勉強算是小品，但卡士強勁，胡定欣、田蕊妮再加台柱陳豪，所以李佳芯說：「拍呢啲小品角色，從來都無諗過會提名。當初覺得呢部小品能夠入屋，可以觀眾鍾意，如果有提名已經好開心。」除了謙虛亦有實質數據支持。

TVB熱播劇集《BB來了》一眾演員包括李佳芯、黎諾懿、徐榮、楊卓娜、黃長興、姚嘉妮等今日（31）為劇集播映「滿月」，一齊切BB造型嘅水果蛋糕慶祝。活動中，大會安排超過40名BB撐場，見到BB咁可愛，Ali都忍唔住話拍攝時嘅母愛都湧晒出來。

Ali寧投資BB

Ali又直言自己一向鍾意BB，完全唔覺得BB煩：「完全唔覺得煩，如果講煩，養動物咪仲煩。因為BB始終都係人類，你可以佢溝通，就算BB得幾個月，佢其實都聽到，知你做緊乜，其實好叻。所以我覺得投資BB反而仲值得。」雖然對BB愛不釋手但談到生育計劃，Ali就坦言未必會生：「拍呢部劇都知，好多時你想有但最後可能無，生BB都係講緣份，呢個係我拍完呢部劇一個幾深嘅感受。」

「貼地女神」唔排除閃婚 Ali：感覺嚟就結

談到早前Ali曾揚言唔排除閃婚，佢即笑言：「點解講到我下個月就閃婚咁，其實緣份同感情好難講，感情話唔埋下個月分開又唔出奇，結婚又唔出奇，真係無人知。我會相信感覺，感覺嚟到，好想結婚嘅我咪結婚囉。好想要一個屋企或者好想要一個小朋友，可能我咪考慮生BB囉，但暫時真係未有呢個打算，感覺下年都係拍劇同拍劇。」